अरे मनुक्षा, एवढं काय ते करून घे १६/४/२०२०

झालाय नाईलाज तर आता पुरता इलाज करून घे |

रिकामी सारी खोली मनाची आटोकाट भरून घे |

अरे मनुक्षा, एवढं काय ते करून घे |

बसलास घरी आता तर, परी आपल्या माणसात बसून घे |

निखळ नितळ विनोद करत समवेत तू ही हसून घे |

अरे मनुक्षा, एवढं काय ते करून घे |

थांबलास आहे जेथे होतास तेथेच, परी पूर्णपणे थांबून घे |

सांभाळलस इतरांना थोडं, स्वतःला ही सावरून घे |

अरे मनुक्षा, एवढं काय ते करून घे |

असशील चिंतेतही थोडे काही परी चिंतन ही करून घे |

मग्न निराशेत न होता मस्त मनाची पोकळी भरून घे |

अरे मनुक्षा, एवढं काय ते करून घे |

असतील मर्यादा वस्तूंना परी मर्यादा तुझी ओळखून घे |

पडले असेल अंतर इतरांत परी अंतर्मन निरखून घे |

अरे मनुक्षा, एवढं काय ते करून घे |

वाचला असशील उद्रेकातून परी गोष्टी चार ओळी वाचून घे |

जावेसे वाटेलच बाहेर कुठे परी घरातच पुरता तू राहून घे |

अरे मनुक्षा, एवढं काय ते करून घे |

पसरवतील संशय लोक परी गाठ विश्वासाची बांधून घे |

पसरतंय किल्मिष द्वेषाच परी अमृत प्रेमाचं गाठून घे |

अरे मनुक्षा, एवढं काय ते करून घे |

होतेय घुसमट आतल्या आत परी आतल्याचा वेळ राखून घे |

दिसतील चुका आप्तांच्या खूप परी तेवढं निकरानं झाकून घे |

अरे मनुक्षा, एवढं काय ते करून घे |

मिळाला आहे वेळ फुका परी ती संधान स्वत:शी साधून घे |

शोधती सगळेच बाहेरी मात्रा परी ती शोध मात्र आतून घे |

अरे मनुक्षा, एवढं काय ते करून घे |

--- डॉ सचिन शंकर गाडेकर

स्पंदने माझी