करावे काय?

करावे काय? ६/७/15

करावा नमस्कार वाकून वा जोडावे हात कोपरापासून |
धरावा हाथ सैतानाचा वा सोलून काढावे ढोपरापासून |

वाढतच चाललाय दिनमासी अघोरी उन्माद यांचा |
खुळेपणाला लाजवेल हो असला खुळा नाद यांचा |
 

अर्थहीन फोलके सारे पसरी नुसताच फुफाटा वावधान |
निखळतील तारे बहुमोल अन होतील दूर खरे विद्वान |

करू घातले यत्न खोटे व्हावे अवजड काही अवघड |
निरस आणी निरर्थक भाषा, सोबती निर्व्याज बडबड |

प्रजा होतीच आंधळी म्हणा  आता राजा ही झाला लहरी |
संपेना रात विलंबी येथे बघा अंधारी दळतेय म्हातारी |

 
झाकून नयन निर्णय सारे आणी करताय भला अन्याय |
आरंभ असा तर नकोच कल्पना कसा होतो शेवटचा अध्याय |
 
                                      -  सचिन गाडेकर