म्हटल मी ही मग ...... जमणार नाही.
म्हटल मी ही मग ...... जमणार नाही.
उगवतीचा अरुण म्हणे सोबती मज रहा |
लवकर उठोनी कसा प्रसन्न सजग रहा |
म्हटल मी ही मग ...... जमणार नाही
ओरडून सांगत ये सोबती चिवचिवणारे थवे |
उंच उडावे विसरून धरणी तुही आमच्यासवे |
म्हटल मी ही मग ...... जमणार नाही
वेगवान गतिमान जीव म्हणे वेग असा धर |
अंतर विद्युतवेगे तू आता क्षणात पार कर |
म्हटल मी ही मग ...... जमणार नाही
भेटलेही महाभाग असे म्हणे ठेव राखीव तुझे बोल |
कवाडे मनाची मुक्त फक्त जातीनिहायच खोल |
म्हटल मी ही मग ...... जमणार नाही
होते कोणी आत्ममग्न म्हणे नेहमी हातचा एक सोड |
लागावे यावे तुजकडेच म्हणूनच ठेवावी एखादी खोड |
म्हटल मी ही मग ...... जमणार नाही
कसला रे त्याग-बिग उगाच दरीयादील बनलास तू |
नकोस भेटू म्हणे असे धरून मने दिलखुलास तू |
म्हटल मी ही मग ...... जमणार नाही
करावा कसला यत्न म्हणे मिळतेच सुख आरामात |
केली पंची पोपटाची कि आपोआप होते रे करामात |
म्हटल मी ही मग ...... जमणार नाही
भोग रे आनंद का सदा दमतो स्वल्प अल्प विरामात |
काढ वेड्यात थोडे काहींना ठेव आगळीच संभ्रमात |
म्हटल मी ही मग ...... जमणार नाही
कर म्हणे पूजापाठ नवस फक्त होईल सारे सोपस्कार |
जोड हात,नमव शीर, विसर विद्रोह विरोध प्रतिकार |
म्हटल मी ही मग ...... जमणार नाही
जग म्हणे बेबंद धुंद विसरून माया दया उपकार |
लाठीवाल्याचाच इथे कसा मस्त चालतो अधिकार |
म्हटल मी ही मग ...... जमणार नाही
घे रे दे रे कामासाठी किती वेळा नाही तू म्हणणार |
पैसा आहे धर्म ज्याचा तोच इथे बघ राज करणार |
म्हटल मी ही मग ...... जमणार नाही
थांब म्हणे लेखणी आता थोडा घेऊन बघ विश्राम |
दे आराम तनामनास आता कर पुरे आजचे काम |
म्हटल मी ही मग ...... जमणार नाही
-सचिन गाडेकर
Comments
Post a Comment